(ኢትዮ 360 _ግንቦት 8/2015) በሲዳማ ክልል የተቋቋመው የሙስና ኮሚቴ ወንጀለኞችን እየደበቀ ነው።

በሲዳማ ክልል የተቋቋመው የሙስና ኮሚቴ ዋና በሌብነት የሚጠየቁ ከፍተኛ አመራሮችን ጉዳይ በመሸፈን ወንጀለኞችንና ወንጀልን እያበረታታ ነው ሲሉ ነዋሪዎቹ ለኢትዮ 360 አስታወቁ።

ኮሚቴ ተብሎ የተቋቋመው ጥቆማ የቀረበባቸውን ተጠርጣሪዎች በመለየት ምርመራ መጀመሩን ለኢትዮ 360 በላኩት መረጃ ላይ አስፍረዋል።

ሆኖም ምርመራው ያተኮረው በጥቃቅን ጉዳዮች ላይ ብቻ መሆኑ ዋናውን የወንጀሉን ባለቤቶች የልብ ልብ እንዲሰማቸው አድርጓቸዋል ባይ ናቸው።

በተለይ የክልሉ ርዕሰ መስተዳድርን ጨምሮ በአጠገቡ ያሉትን የሌቦች ስብስብ ሁሉ ላለመንካት ኮሚቴው እያደረገ ያለው መሸፋፈን እንዳስቆጣቸውም ይናገራሉ።

የክልሉ ከፍተኛ ባለሥልጣናትን ጨምሮ በሌብነት የተዘፈቁና ጥቆማ የቀረበባቸው ቢሆንም ኮሚቴው ትኩረት ያደረገው በትርፍ አበል ላይ ብቻ መሆኑ በራሱ አነጋጋሪ ሆኗል ሲሉ አስቀምጠውታል።

የኮሚቴን ስራ በቅርበት እየተከታተሉ መሆናቸውን የገለጹት ነዋሪዎች በክልሉ ጥቆማ የቀረበባቸውና በተጨበጭ የማጣራት ሥራ ተሠርቶ መጠዬቅ ያለባቸው ግለሰቦች መለየታቸውን ማረጋገጣቸውን አመልክተዋል።

በዚህም እስካሁን የተለዩት አንድ መቶ ሃምሳ ግለሰቦች ሲሆኑ ከእነዚህ መካከል ባለፈው ሳምንት ወደ ሳላሳ የሚጠጉ ግለሰቦች በፖሊስ ቁጥጥር ሥር ውለው ምርመራ እየተደረገባቸው መሆኑን ይናገራሉ

ከእነዚህ መካከል የሀዋሳ ከተማ ፋይናንስና ኢኮኖሚ ልማት መምሪያ ኃላፊ እንደሚገኝበት በመረጃቸው ላይ አስቀምጠዋል።

ነገር ግን ይላሉ ነዋሪዎቹ አሁን የታሰሩትም ሆኑ ስማቸው ተለየ የተባሉት አመራሮችና ሰራተኞች ከላይ ላለው አመራር ድጋፍ የሚሰጡ እንጂ ዋና የሌብነቱ ምንጮች አይደሉም ብለዋል።

ስለዚህ ኮሚቴው እየሰራ ያለው ስራ ግልጽነት የጎደለውና ምናልባትም ከላይኛው አመራር ተጽእኖ ያልተላቀቀ በመሆኑ ምንም አይነት ለውጥ ያመጣል ብለው እንደማይጠብቁም ለኢትዮ 360 በላኩት መረጃ ላይ አስፍረዋል።